Vijayadasami in Srirangam Thayar Sannidhi

ஸ்ரீ:
ஸ்ரீமதே ராமாநுஜாய நம: ஸ்ரீமத் வரவரமுனயே நம:

புரட்டாசி நவராத்ரி நவமி, மற்றும் தசமி ஆகிய நாட்களில் நடைபெறும் வைபவங்கள்
(16, மற்றும் 17-10-2010)
ஐ.நவமி அன்று நடைபெறும் வைபவங்கள்
1. பெரியபெருமாள் பெரிய அவசரம் அமுது செய்ததும், கருகூல நாய்ச்சியார், நாயகர் அறை நாய்ச்சியார், சுக்ரவார நாய்ச்சியார், (இவர் பரிமள அறையில் எழுந்தருளியுள்ளார். இது யாகசாலைக்கு அருகில் உள்ளது.) அரவிந்த நாய்ச்சியார், (அன்னமூர்த்தி ஸந்நிதியில் எழுந்தருளியுள்ளார்.) ஹயக்ரீவர், ஸரஸ்வதி, செங்கமல நாய்ச்சியார், குருகூர் நாய்ச்சியார், (இவர் கோசாலையில் எழுந்தருளியுள்ளார்.)  ஆகியோர்களுக்கும், மேளம் முதலிய வாத்தியங்கள், துவாரங்கள் முதலியவற்றுக்கும் திருவாராதனம், கடதீபம், அமுதுபடிகள் ஸமர்ப்பித்தல் ஆகியவை நடைபெறும்.
2. ஸ்ரீரங்கநாய்ச்சியாருக்குப் பெருமாள் மாலை அனுப்புதல்: ஸ்ரீரங்கநாய்ச்சியார் தினந்தோறும் போலப் புறப்பட்டு மண்டபம் எழுந்தருளுவார்.
3. கொலுமண்டபத்தில் நாய்ச்சியாருக்கு பஹிரங்கமாகத் திருமஞ்சனமாகி தளிகை அமுது செய்வித்ததும், பெரியபெருமாளிடமிருந்து மாலை வரும்.
4. நம்பெருமாள் அர்த்தஜாம பூஜையான செலவுசம்பா, திருவாராதனமும், தளிகையும், அரவணைப் பிரஸாதமும் கண்டருளிய பிறகு, நட்டுமுட்டு வாத்திய கோஷத்தோடு நம்பெருமாளுடைய கஸ்தூரித் திருமண் காப்பு, வஸ்திரம், சாற்றுபடி, மாலை ஆகியவற்றைக் களைந்து அர்ச்சகர்  ஸஹஸ்ர தாரைத்தட்டில் வைப்பார்.
5. பெரிய கோயில் ஸ்தாநீகர் மாலையை சிரஸா வஹித்து தாஸநம்பி பந்தத்துடனும், காப்பந்தத்துடனும் வாத்திய கோஷத்துடனும் வெளியே கொண்டு வருவார்.
6. அப்பொழுது குதிரையும் காவேரியில் தீர்த்தமாடிப் பெருமாளுடைய மாலையைப் பின் தொடர்ந்தே நாய்ச்சியார் ஸந்நிதிக்கு எழுந்தருளப்பண்ணப்படும்.
7. மாலையை ஸ்தாநீகர் தம் சிரஸ்ஸினின்று இறக்கி அர்ச்சகரிடம் கொடுத்தவுடன், அர்ச்சகர் அதை நாய்ச்சியாருக்குச் சாற்றி, நாய்ச்சியார் சாற்றிக்கொண்டிருக்கும் மாலையைக் களைந்து, ஸ்தாநீகருக்கு ஸாதித்து ஸேவை மரியாதை செய்து வைப்பார்.
8. நாய்ச்சியாருக்கு எதிரில் நிற்கும் குதிரை நம்பிரானுக்கும் திருவாராதனம் நடந்து, பிரஸாதமும், மொச்சைச் சுண்டலும் நிவேதனம் செய்யப்படும்.
9. உத்ஸவபூர்த்தி: பிறகு, நாய்ச்சியார் தீர்த்த விநியோகம் முதலியவை ஆனபிறகு, புறப்பட்டுக் கண்ணாடியறை வாசல் சேர்ந்ததும், திருத்தாழ்வரை தாஸர் எழுந்தருளி, படிப்பு ஸேவிப்பது ஒருகாலத்தில்  நடந்து வந்தது. இது இப்போது நடைபெறுவ தில்லை.
10. ரக்ஷாபந்தன விஸர்ஜனம்: நாய்ச்சியார் உள்ளே எழுந்தருளியதும் ரக்ஷாபந்தனம் களையப்படும். நாய்ச்சியாருக்குத் திருவாராதனமாகி ரக்ஷா பந்தனத்தைக் களைந்து, செலவுசம்பா தளிகையும், அரவணையும் அமுது செய்வித்து, வெளியே நாய்ச்சியாருக்கு எதிரிலிருக்கும் குதிரை நம்பிரானுக்கும் திருவாராதனமாகி, ரக்ஷாபந்தனம் களைந்து, மொச்சைச்சுண்டலும், பிரஸாதமும் நிவேதனமாகும்.
11. பிறகு, குதிரை நேராகப் பெரியபெருமாள் ஸந்நிதிக்குப்போய் பெரிய பெருமாளுக்கெதிரே நிற்க, அங்கே குதிரைக்கு மறுபடியும் ரக்ஷாபந்தனம் முதலியவை நடக்கும்.
12. குதிரைக்கு ரக்ஷாபந்தனமானதும் பெரியபெருமாள் பால் அமுது செய்வார்.
13. விஜயதசமி:  உதயத்திலேயே நம்பெருமாள் பொங்கல், பெரிய அவசரம் திருவாராதனமும், தளிகையும் கண்டருளிப் பல்லக்கில் புறப்பட்டு, கீழைக்கோட்டை வாசல் மார்க்கமாய் புறப்பாடு கண்டருளி, பலவிடங்களில் வழிநடை உபயங்கள் அமுது செய்து, காட்டழகியசிங்கர்  ஸந்நிதியிலுள்ள வெளிமண்ட பம் எழுந்தருளுவார்.
14. மண்டபத்தில் திருவாராதனமாகித், தளிகை அமுது செய்வித்து, தீர்த்த விநியோகம், பிரஸாத விநியோகம் முதலியவை நடந்த பிறகு, மாலையில் குதிரை வாஹனத்தில் எழுந்தருள்வார்.
15. வில்லும் அம்பும் வந்தபிறகு நம் பெருமாள் புறப்பட்டு வெளியே வந்து, சிங்கர் ஸந்நிதி வாசலிலுள்ள நாலுகால் மண்டபம் எழுந்தருளுவார்.
16. நம் பெருமாள் அம்பு போடுதல்: அர்ச்சகரும் கோயில் புரோஹிதரான புள்ளச்சி வாத்தியார் ஆகிய இருவரும் எதிரி லுள்ள வன்னிமரத்தடியில் போய் மரத்துக்குத் திருவாராதனம் செய்வார்கள்.
17. மரத்துக்குத் தளிகை அமுது செய்வித்ததும், அர்ச்சகர் நம்பெருமாளிடம் வந்து கையில் வில்லைப்பிடித்து நாலு திக்குக்கும் நாலு அம்புபோடுவார். புள்ளச்சி வாத்தியார் கையில் சித்தமாய் வைத்திருக்கும் வன்னித்தழை கோஷ்டிக்கு விநியோகம் செய்யப்படும்.
18. பிறகு நம்பெருமாள் புறப்பட்டு கீழை அடைய வளஞ்சான் தென்பாதி வழியாகவே சாத்தாரவீதி யெழுந் தருளித் தெற்கு வாசலில் தெற்கு முகமாய்த் திரும்பி, அதிவேகமாய் ராயகோபுரம் வரைக்கும் வேட்டையாடிக் கொண்டு போய்த் திரும்புவார்.
19. நம்பெருமாள் வடக்கு முகமாய்த் திரும்பி பானகம், வடைப்பருப்பு அமுது செய்து, நேராக ஸந்நிதிக்குள் போய், கருகூல நாலுகால் மண்டபத்தில் (மீனாக்ஷி மண்டபம்) திருவந்திக்காப்பு செய்து கொண்டு சந்தன மண்டபம் எழுந்தருளியதும், திரை ஸமர்ப்பிக்கப்படும். பிறகு திருமஞ்சனம் நடைபெறும்.